სამთო გამყოლი

IV საფეხურის საერთაშორისო სადიპლომო პროგრამა (24 თვე). პარტნიორი - IFMGA თუ მთაში სიარული, კლდეზე ცოცვა, თხილამურებით სრიალი და მწვერვალების დაპყრობა შენი ცხოვრების ნაწილია და გინდა საყვარელი საქმიანობა პროფესიად აქციო, მაშინ სამთო გამყოლის კურსი სწორედ შენთვისაა. 2 წლიანი სადიპლომო პროგრამა სათავგადასავლო ტურიზმის უმაღლეს საერთაშორისო კვალიფიკაციას მოგანიჭებს. ეს არის გამორჩეული ტექნიკური და ფიზიკური უნარების მქონე ადამიანებისთვის შექმნილი ინტენსიური, რთული, ადრენალინით სავსე თავგადასავალი, რომლის წარმატებით დაძლევაც სათავგადასავლო საგამყოლო კარიერის მწვერვალზე აგიყვანს. სწავლის შედეგად შეძლებ იმუშავო გამყოლად ნებისმიერი სახის და სირთულის საფეხმავლო, ალპინისტური, Free Ride და Heli Ski ტურზე, წლის ყველა სეზონზე. შეძლებ შეაფასო რელიეფი და გარემო პირობები, დაადგინო ზვავსაშიშროების საფეხური, ასვლის და დაშვების უსაფრთხო მარშრუტები და საჭიროების შემთხვევაში ჩაატარო სამაშველო ოპერაცია. პროგრამის დასასრულს გახდები „საქართველოს სამთო გამყოლთა ასოციაციის (GMGA)“ და „სამთო გამყოლთა ასოციაციების საერთაშორისო ფედერაციის (IFMGA)” წევრი, რაც საშუალებას მოგცემს აწარმოო პროფესიული საქმიანობა ევროპის, ამერიკის და აზიის 25 წევრ ქვეყანაში.

სათხილამურო ინსტრუქტორი

პროფესიული გადამზადების პროგრამა თუ ყოველ წელს მოუთმენლად ელი ზამთრის სეზონს და სრიალთან ერთად შენი საყვარელი საქმიანობაა სხვებსაც დაეხმარო შეისწავლონ სრიალის ტექნიკა და ისიამოვნონ ზამთრის თავგადასავლებით - მაშინ სათხილამურო ინსტრუქტორის პროგრამა შენთვისაა. სათხილამურო ინსტრუქტორის I, II და III დონის კურსების განმავლობაში გაეცნობი სათხილამურო ტურიზმში თხილამურის ინსტრუქტორის საქმიანობის ძირითად ასპექტებს, სწავლების თანამედროვე, საერთაშორისო სტანდარტების შესაბამის მეთოდიკას, სასწავლო პროცესის სწორად დაგეგმვას, ასევე, ტურისტზე ზრუნვის, კომფორტის და უსაფრთხოების უზრუნველყოფის პრინციპებს. პროგრამის დასასრულს გეცოდინება თხილამურებით სრიალის სწავლება საერთაშორისო პრაქტიკის შესაბამისად. შეძლებ სწორად შეარჩიო სასრიალო აღჭურვილობა, ისრიალო სხვადასხვა ტექნიკის გამოყენებით კურსის შესაბამისი სირთულის სათხილამურო გზაზე, ჩაატარო ინსტრუქტაჟი და ასწავლო სრიალი „მწვანე“ „ლურჯი“ და „წითელი“ კატეგორიის სათხილამურო გზებზე.

ველო ტურის გამყოლი

მოკლევადიანი გადამზადების პროგრამა. პარტნიორი - „კავკასიის ველო ქსელი“ ყველაზე ეკო-მეგობრული ტრანსპორტით მოგზაურობის მოყვარულთათვის შეიქმნა ველოტურის გამყოლის ინტენსიური, 6 კვირიანი პროფესიული სასერთიფიკატო პროგრამა, რომელიც სხვადასხვა ტიპის გზებზე, ბუნებაში, აუდიტორიასა და ველოსახელოსნოში მიმდინარეობს. კურსის მსვლელობისას, მრავალ პრაქტიკულ უნარებთან ერთად, ისწავლი საერთო სარგებლობის გზებსა და უგზო ველურ გარემოში უსაფრთხოდ ნავიგაციას, ტურისტებთან სწორი კომუნიკაციას, რისკების მართვას და ველომოგზაურებისთვის ტექნიკური დახმარების აღმოჩენას. პროგრამის დასასრულს გეცოდინება როგორ დაგეგმო და განახორციელო უსაფრთხო, კომფორტული და საინტერესო ველოტური. კურსი გათვლილია სხვადასხვა სირთულისა და ხანგრძლივობის მარშრუტზე გამოცდილების მქონე ველოსიპედისტებზე - ვისაც სურთ საგამყოლო საქმიანობის დახვეწა და საქართველოში ველოტურიზმის განვითარებაში მონაწილეობა. პროგრამის პარტნიორი: „კავკასიის ველო ქსელი“ 2019 წელს დაარსდა ველომოყვარულების მიერ, აერთიანებს 14 ორგანიზატორსა და რამდენიმე ათას წევრს, ქსელი ახორციელებს სხვადასხვა პროექტს/ღონისძიებას, როგორც საგანმანათლებლო, ასევე სათავგადასავლო და სპორტული მიმართულებით.

GMGA-ს გამყოლების პროფესიული კომპეტენციის ჩარჩოები

წაიკითხე მეტი